The KAMPI candidates for sangguniang bayan seats and their Independent mayoralty candidate, Mrs. Amelia G. Bitonio, made the rounds earlier and distributed this letter to voters. Whatever our respective political affiliation, I think this is worth reading and pondering upon, so I’m publishing it in its entirety.

SURAT NI AMELIA “AMY” PENEYRA GASCON BITONIO, PARA MAYOR
BASAEN TI SAIBBEK TI MAIRURUMEN

Ipatpategko unay a kailiak ditoy San Juan:

Dios unay ti agngina iti panangtedyo kaniak ti gundaway a sumrek iti kaunggan ti puso ken panunotyo babaen iti daytoy innak pannakisarsarita kadakayo. Ikarkararagko iti Nailangitan nga Ama nga itdenna a kanayon kadakayo ti ayat, kappia ken bendisionna. Nalabes ti ayatko nga umayak a mismo a makisarita kadakayo. Nalaus ti kalikagumko a danonen kayo amin a kailiak tapno personal a riknaek ti bara ti dakulap ken abrasayo kaniak. Ngem dispensarendak ta diakon maaramid dagitoy gapu iti kellaat a nadangkok a trahedia a napagteng ti patpatgek unay nga asawak, ni Percy.

Imbuis ti asawak ti bagina gapu iti ayatna kaniak ken iti ili tayo. Pagulidanan nga asawa ken ama. Diak man pulos nakarikna iti ulpit wenno panangpasakitna kaniak. Tinagtagibinakami kadagiti annakmi iti bin-ig nga ayat ken dungngo. Kakibinko ti asawak kadagiti amin a plano ken sirmatak. Isuna ti kabinbinnuligko kadagiti amin a panggep ken gannuatko. Isu ti pigsak ken katakunaynayko. Ay-ayaten unay ti asawak ti ili tayo ta uray taga-Narvacan, pinilina ti nakipagili kaniak ditoy San Juan, ken impatakdermi dagiti negosio a mangipaay pagsapulan ken makatulong kadagiti kailian. Isu ti ama ti tarigagayko iti politika gapu iti gagemmi a makapagserbi iti ili. Daytoy ti gapu nga idi 2004, naglusulosak a DepEd District Supervisor ket nakisalisalak a Mayor ken kinalikagumak ti panagbalbaliw ti San Juan. Inaramidko amin a kabaelak a nagkampania. Ket inawatko a sipapakumbaba ken sidadayaw ti pannakaabakko. Narigat ti mapaay iti politika. Sayang dagiti sakripisio, panawen, ken gameng a bunga ti ling-etmi nga agassawa. Sinagrapmi ketdi ti pannakalalais, panangumsi ken pannakapastidiar. Naabakak la ngaruden, inapektaran pay ti politika ti akem ti asawak. Ngem naasi ti Dios ta tinulungannakami a bumangon manen iti pannakadalebmi a pinarnuay ti politika.

Diak koman gamden pay ti agkandidato manen ta naramanakon ti pait ti limdo ti mapaay. Diak koman kayat nga ukritan manen dagiti piglat nga imbati dagiti sugat a pinataud ti politika. Diak koman kayat nga isugal manen ti amin a puso ken riknak, napateg a panawen ken dagiti pagrigrigatanmi nga agassawa. Ngem iti yaasideg ti panaggibus ti panagipila iti kandidatura, naammuak nga awanen ti mayat a taga-San Juan a sumango iti agdama a turay. Imkis ti kaunggak: Awan la kadin ti maingel a taga-San Juan a mangiyopresar iti bagina a Para Mayor tapno adda pagpilian dagiti umili? Agbalin la kadin nga awanan-gaway dagiti taga-San Juan ket awatendan no anian ti addan? Tinitilengnak ti konsensiak. Nagpabalakadak iti asawak. Nagpaidalanak iti Dios ken kadagiti padi. Agingga ti nadesisionak nga agkandidatoak manen a Para Mayor.

Ngem adu dagiti tubeng ti itatapogko manen iti politika. Sakbay a nagipilaak iti kandidatura, adda dagiti nangallukoy kaniak nga agkandidatoak laengen a Bokal. Ikkandak iti gastosek ken sigurado kanon a mangabakak. Makagargari a diaya tapno awanen ti sumango iti agdama a turay. Ngem saanak a nasulisog ta nagari ti ayatko nga agserbi iti ilik. Adda pay puersa a nangpatengngel iti nominasionko iti partido no man pay naikkan iti nominasion ti Bise Mayorko ken dagiti Konsehalko. Ket nag-Independienteak kalpasan nga imparikna dagiti kadduak ti suportada kaniak. Napateg ngamin ti addaan partido a kandidato ta dakkel ti itdenna a pondo, suporta ken tulong; mapalubosan pay nga agyan iti presinto ti Pollwatcher ken maikkanda iti kopia ti election returns. Independienteakon ngem adda latta puersa nga agamak iti kandidaturak ta insarunoda a pinaibabawi ti nominasion dagiti kadduak tapno upayendak. Ngem diakto pulos agbuteng wenno umatras iti dangadang.

Ti asawak ti maysa a teddek ti grupomi, ket nasaktan unay ti riknana idi maammuanna a naibabawi ti nominasion dagiti kadduak. Ammok nga inlimlimedna dagiti tignay ken addangna a nangirupir iti kalinteganmi. Agingga iti naraut ken napaltogan iti opisinana idi tengnga ti aldaw ti Abril 18. Naikamang ken naopera iti ospital, agingga a napugsat ti angesna idi malem ti Abril 21. Natayen ni Percy, ti ipatpategko unay nga asawak! Kakuyognan a maitanem dagiti naraniag a sirmatana para iti San Juan! Kasla mapirpirsay toy pusok ken diak magawidan nga agarubos dagitoy luak tunggal malagipko dagiti ayat ken dungngona kaniak. No dadduma, babbabalawek ti bagik a sibibiag pay laeng koma no saanakon a timmapog iti politika. Ngem amok a ragsakna met ti panagballigik nga asawana iti politika. Ket sapay koma ta iti pannakapapatayna ket saan nga agbalin nga awan kaes-eskanna. Matukay koman dagiti puso ken nakem tayo a mangsurot iti ikkis ti konsensia tayo. Panawenen nga isubli ti Turay kadagiti Umili! Ti Turay ket Kukua dagiti Umili! Saan a Kukua ti sumagmamano laeng!

Iti pannakidangadangko manen iti politika, Uppat dagiti ibilangko nga Adigi ti Bilegko: Bileg manipud ken Cristo; Bileg manipud kadagiti Umili; Bileg manipud iti Asawak; ken Bileg manipud iti Partido. Nagballigin dagiti awanan-dios a parsua a nangpukaw iti asawak ken partidok. Ngem didanto agballigi a mangagaw kaniak iti Bileg ni Cristo ta isuna ti pagtaklinak a magun-odko ti Bilegyo nga Umili. Natayen ti asawak! Awanen ti partidok! Ni Cristo ken dakayo nga umili laengen ti mangpabpabileg kaniak! Adtoyak iyopresarko ti bagik a para Mayor ti San Juan. Isapatak iti Dios a pagserbiankayonto a sidadalus ken sipupudno. Kiddawek pay ti panangsuportayo kadagiti amin a maingel a kakadduak – Para Bise Mayor: Denmark Bueno; Para Konsehal: Dr. Caridad Gascon Advincula a kabsatko, Atty. Constante Ayuyang, Jr.; Melvin Gorospe, Elsa Nolasco, Marino Peneyra, Rex Quilala, Richard Varilla, Jr. ken Ex-SBM Victorio Vega, Jr.

Dios unay ti agngina ken mangaywan kadakayo!

‘Toy mangipatpateg kadakayo,

(Sgd.) AMY GASCON BITONIO

Filed under: May 2007 | You can follow any responses to this entry through the RSS 2.0 feed. You can leave a response, or trackback from your own site.